Në kuadër të javës së 36’të në Serie A u zhvillua sot ndeshja ndërmjet Torinos dhe Napolit dhe në fushë u paraqitën hiç më pak se tre kosovar. Etrit Berisha dhe Mërgim Vojvoda luajtën për Torinon kurse Amir Rrahmani për Napolin.
Skuadra e Napolit shënoi fitore me rezultat 0-1 në sfidën ndaj Torinos si mysafir dhe golin e vetëm për napolitanët e realizoi mesfushori spanjoll, Fabian Ruiz në minutën e 73’të.
Portieri i Kombëtares së Shqipërisë, Etrit Berisha arriti që në minutën e 60’të të pres edhe penalltinë e sulmuesit, Lorenzo Insigne dhe sipas SofaScore ka qenë edhe lojtari më i vlerësuar në ndeshje me notën 7.9, së bashku me Fabian Ruiz.
Paraqitje të mrekullueshme zhvilloi edhe mbrojtësi i Kosovës, Mërgim Vojvoda i cili u vlerësua me notën 7.2, kurse bashkëlojtari i tij tek Kombëtarja, Amir Rrahmani nuk ishte edhe në formën e tij më të mirë dhe u vlerësua me notën 6.3. Vlen të theksohet se tre futbollistët u paraqitën për 90 minuta.
Kujtojmë se Napoli me këtë fitore tashmë arrin në kuotën e 73 pikëve dhe mbetet në pozitën e tretë në tabel, ndërsa Torino është në vendin e dhjetë me 47 pikë.