Guglielmo Vicario është portieri që ka bërë më shumë pritje deri në këto momente të sezonit 2021-2022, duke marrë parasysh 5 ligat më të forta në Europë, ato angleze, italiane, gjermane, franceze e spanjolle.
Sipas agjencisë së statistikave të futbollit, OPTA, 25-vjeçari italian i Empolit ia ka dalë të bëjë 127 pritje deri tani, me një mesatare prej 4 pritjesh për ndeshje, duke konfirmuar se po kalon një sezon të jashtëzakonshëm.
Vicario është shok ekipi me futbollistët e kombëtares shqiptare si Ismajli, Asllani e Bajrami, teksa te Empoli është në huazim me të drejtë blerjeje nga skuadra e Cagliarit që zotëron kartonin e tij.
Në fund të sezonit Empoli do të ushtrojë të drejtën e blerjes për 10 milionë euro, por gjithsesi Vicario pritet të qëndrojë pak te toskanët, pasi për të kanë shfaqur interes shumë klube të Serisë A, që janë gati të paguajnë dyfishin.