Përzgjedhësi Edoardo Reja ka dhënë përgjigje të gjatë në konferencën për media të enjten, kur u pyet për punën që është bërë te Shqipëria. Ai tha se ka ende punë për t’u bërë, ndërsa pret që ndryshimet të ndodhin që prej ndeshjes kundër Izraelit.
Shqipëria e pret Izraelin të premten nga ora 20:45. Ndeshja Shqipëri – Izrael luhet në stadiumin “Air Albania” në Tiranë dhe i takon grupit të dytë të Ligës B të Ligës së Kombeve.
Reja pret që ndaj Izraelit futbollistët e Shqipërisë të jenë më konkretë në sulm. Ai nuk ka treguar se me cilët lojtarë do të paraqitet në sulm. Është pyetur nëse startues do të jenë Armando Broja dhe Myrto Uzuni. Por, Reja ka refuzuar ta zbulojë formacionin.
“Ne po punojmë që të mundohemi të përfundojmë sa më shumë aksione ofensive. Për shembull, duke parë edhe një herë ndeshjen me Islandën, nuk kemi arritur asnjëherë kaq shumë në fundore, por për fat të keq finalizimi, që është aspekti i konkretizimit të punës, nuk na del, në një mënyrë apo tjetër. Kemi probleme në pasimin e fundit, e kemi diskutuar edhe me djemtë. Do të gjej zgjidhje të tjera për të vënë në vështirësi Izraelin. Nga kjo pikëpamje e kemi përgatitur mirë skuadrën për t’i shfrytëzuar situatat. Pastaj në fushë shihet kush e meriton më shumë a më pak, është një diskutim që mbetet i hapur. Duhet të merret në konsideratë se asnjë skuadër nuk ka asgjë për të humbur. Rënie nuk ka, ndaj tension nga ana jonë nuk ka”, ka thënë Reja.
Ai ka paralajmëruar një lojë të hapur nga kuqezinjtë.
“Do të luajmë të hapur dhe do ta bëjnë edhe të tjerët. Ideja jonë është të mos e humbim ndeshjen dhe të mos vuajmë se ata shtyjnë përpara me shumë lojtarë. Kjo taktikë mund të na vërë në vështirësi, sepse janë të shpejtë, bëjnë presion në çdo cep të fushës. Kur gjen këto skuadra mund të kesh vështirësi. Por edhe ne kemi forcat tona, ne do të punojmë që t’i vëmë në vështirësi duke marrë në konsideratë vlerat e kësaj skuadre, pasi ka vlera të rëndësishme”, ka deklaruar Reja.
Reja ka theksuar se Izraeli ka disa ndryshime.
“Është një skuadër që vrapon shumë, lojtarët që ka janë ofensivë dhe të shpejtë. Edhe krahët e mbrojtjes marrin pjesë në aksione. Kjo mënyrë loje mund të lërë hapësira që ne duhet t’i shfrytëzojmë, sidomos sa i përket fazës mbrojtëse”, ka thënë Reja.
Ndërkohë, mbrojtësi Berat Gjimshiti ka theksuar se skuadra do të japë maksimumin në sfidën ndaj Izraelit. Ai e ka lënë pas gabimin kundër Islandës të cilin do të përpiqet ta korrigjojë në këtë sfidë.
“Çdo kundërshtar të jep presion. Nuk ka skuadër që nuk të jep presion. Është më mirë që ka presion pasi je më i përqendruar. Skuadra ka objektiv vendin e parë. Duket në stërvitje, të gjithë japim maksimumin. Izraeli ka një skuadër ofensive shumë të mirë, ka lojtarë të shpejtë. Do të shikojmë forcat tona të mbrohemi mirë, por edhe të sulmojmë mirë, sepse nëse shënon fiton. Besoj se në fazën defensive nuk kemi shumë probleme”, ka thënë Gjimshiti.
Gjimshiti ka insistuar se Shqipëria ka skuadër konkurrente për ta siguruar vendin e parë në grup.
“Në çdo punë të gjithë bëjnë gabime, ato korrigjohen në ndeshjen tjetër.
Islanda apo Izraeli. Besoj se është një grup i ekuilibruar, një grup shumë i mirë. Çdo ekip ka shanset e veta për të dalë i pari, kush jep më shumë në fund merr vendin e parë. Në ndeshjen e fundit kemi bërë gjithçka mirë, por mungonte pasimi i fundit i saktë. Ai ishte problemi me Islandën, shpresoj ta përmirësojmë në këtë ndeshje”, ka thënë Gjimshiti.
Shqipëria më 13 qershor luan miqësore ndaj Estonisë në Tiranë, ndërsa në shtator i luan dy ndeshjet e fundit të grupit B2 të Ligës së Kombeve./koha