Ishin kampion në fuqi dhe viti 2022 shënonte 100-vjetorin e themelimit të klubit, andaj Prishtina e nisi këtë edicion me ambicie të larta për të mbrojtur titullin kampion.
Pas 34 xhirove, bardhekaltërit nuk e kanë siguruar ende ekzistencën në elitën e futbollit kosovar, duke shënuar një prej edicioneve më të dobëta në histori të klubit, shkruan Gazeta Olle.
Ish-trajneri i Prishtinës, Ramiz Krasniqi, theksoi se gjendja në klubin bardhekaltër është e mjerueshme dhe vajton për një gjë të tillë.
“Është mjerim që në 100 vjetorin e themelimit Prishtina nodhet në këtë pozitë. Unë me miq të gjeneratës sime vajtojmë sepse është klubi ynë, i fëmijërisë sonë”, deklaroi Krasniqi në emisionin “2me1”.
“Pavarëisht çfarë probleme kanë në kryesinë e klubit, klubi nuk e Meriton të jetë në këtë gjendje. Prishtina është mbi ta”.
“Ky është mjerim. I kam pa dy ndeshje në stadium dhe 3 apo 4 herë në televizior, por e kam ndërruar kanalin nga mllefi”, shtoi mes tjerash ai.
Me 48 pikë në 34 ndeshje, ku ka 13 fitore, 9 barazime e 12 humbje, Prishtina do ta kërkojë mbijetesën pa barazh në dy xhirot e fundit, ku takohet me Dritën dhe Llapin.