Superliga e Kosovës vazhdon nesër me xhiron e ardhshme.
Njëra ndër ndeshjet më interesante pritet të jetë edhe ajo Gjilanit dhe Prishtinës.
Të dy skuadrat nuk po kalojnë në një moment të mirë, por që kanë objektiva të ndryshme. Në njërën anë, Gjilani po lufton për titullin kampion, por tashmë ka një distancë të konsiderueshme pikësh me Ballkanin e vendit të parë, kurse në këtë takim vjen edhe pa trajnerin Munishi, tashmë të shkarkuar.
Në anën tjetër, Prishtina është në një krizë të madhe në të gjitha aspektet, duke qenë vetëm tre pikë larg zonës që dërgon në barazh.
Para këtij takimi, kapiteni i kësaj skuadre, Besnik Krasniqi tha për ‘GazetaBlic Sport’ se do të tentojnë që të marrin pikë nga ky takim.
“Ne jemi gati për këtë takim, kjo është një ndeshje shumë e rëndësishme për ne, do të japim maksimumin për të marrë pikë dhe për të qenë sa më të qetë në tabelë. Shpresoj të rregullohen gjërat sa më shpejtë në klub. Nga qershori unë do të jem futbollist i lirë, mbetet të shihet se si do të rrjedhin gjërat“, tha Krasniqi.
Ndeshja mes Gjilanit dhe Prishtinës zhvillohet nesër në ora 15:00.