Amir Rrahmani është bërë një lojtar mjaft i rëndësishëm i Napolit këtë sezon.
Qendërmbrojtësi kosovar ka shfaqur siguri të madhe në ekipin italian dhe është bërë një titullar i padiskutueshëm.
Nën drejtimin e Luciano Spallettit ai ka përparuar shumë dhe ka bërë ngritje profesionale, shkruan “Gazeta Express”.
Por, mediat italiane janë kthyer disa muaj prapa duke e zbuluar një rast interesant që kishte ndodhur në shtëpinë e Napolit.
Më saktësisht, në muajin shtator të vitit të kaluar, trajneri Spalletti kishte vendosur që në ndeshje me Juventusin t’ia besonte pozitën e titullarit grekut Kostas Manolas (në janar iu bashkua Olympiacosit) dhe në këtë mënyrë ta linte në bankën e rezervistëve Rrahmanin.
E ajo që kishte ndodhur më pas ishte diçka vërtet e papritshme.
Pas ndeshjes, presidenti i klubit, Aurelio De Laurentiis i mllefosur i kishte dërguar “sms” trajnerit Spalletti, nga i cili kishte kërkuar sqarim se përse në atë lojë kishte luajtur Manolas e jo Rrahmani, shkruan mediumi italian “Il Mattino”.
Naturisht, kjo përzierje në vendimet e tij nuk i kishte pëlqyer aspak trajnerit Spalletti, shkruan “Gazeta Express”.
Por, kjo nuk është hera e parë, pasi De Laurentiis iu ka dërguar më parë trajnerëve mesazhe telefonike edhe gjatë ndeshjeve.
Sidoqoftë, Manolas u largua nga Napoli në janar dhe kështu ia liroi përfundimisht vendin Rrahmanit.
Mbrojtësi kosovar ka thënë se ndihet i lumtur në Napoli, por kohëve të fundit po spekulohet se interesim për të ka shfaqur gjiganti anglez, Manchester United.