Skuadra e Milan ka marrë fitore të madhe në udhëtim kundër Veronas.
Lojtarët e Stefano Pioli kanë shënuar një fitore me rezultatin 1:3, në udhëtim kundër Veronas, shkruan lajmi.net.
Ndonëse ishin në disavantazh, ‘Rossoneri’ arritën të përmbysin gjithçka. Goli i parë i ndeshjes u shënua në minutën e 38’, nga Faraoni.
Megjithatë, mentaliteti që duhet për titullin kampion u tregua në këtë ndeshje. Milan barazoi në 1:1 në minutën e 45+3’, me anë të Sandro Tonali.
Djaloshi që sot festoi ditëlindjen gjeti golin edhe në minutën e 50’, kur shënoi për 1:2. Në të dyja rastet Tonali u asistua nga Rafael Leao.
Për t’i dhënë qetësinë skuadrës së Milan u përkujdes Alessandro Florenzi, i cili shënoi në minutën e 87’ për rezultatin final 1:3. Goli i Florenzi erdhi vetëm tre minuta pasi ai u inkuadrua në lojë.
Milan shkon në 80 pikë pas 36 ndeshjeve, me dy pikë më shumë sesa Inter që është në pozitën e dytë. Nëse Inter fiton të dyja ndeshjet, Milan mund të shpallet kampione me një fitore dhe një barazim në dy ndeshjet e fundit.
Verona mbetet me 52 pikë në pozitën e nëntë në tabelë.