Drita e ka nisur furishëm afatin kalimtar të verës, duke shfrytëzuar kohën e pushimeve për të siguruar përforcime.
Nënkampionët e Kosovës në futboll veçse kanë nisur kontaktet me disa nga emrat e njohur të futbollit në vend.
Demokracia.com mëson nga burime të afërta me klubin gjilanas se Drita është në bisedime me sulmuesin e Prishtinës, Leotrim Kryeziun.
Bisedimet mes palëve kanë nisur jo shumë kohë më parë, megjithatë për Dritën nuk do të jetë edhe aq e lehtë “firma” e futbollistit.
Kryeziu ka kontratë me Prishtinën deri në vitin 2024, ndërsa për shkak të krizës financiare që po kalon klubi kryeqytetas, ai ka kërkuar fletlëshim nga klubi prishtinas.
23-vjeçari ishte pjesë e Dritës edhe para disa vjetësh, ndërsa gjatë karrierës së tij ishte pjesë edhe e skuadrës zvicerane, Lugano.
Drita ditë më parë zyrtarizoi mbrojtësin e krahut, Besnik Krasniqin si përforcimin e parë të verës, derisa ka arritur marrëveshje edhe me yllin e Ballkanit, Blend Baftiun.