Milani dhe Interi luftuan deri në fund të kampionatit për titull kampioni. Milani doli triumfues dhe e fitoi titullin e parë pas një kohe shumë të gjatë. Të dyja skuadrat do të luftojnë edhe në afatin kalimtar të verës, por tani për një futbollist shqiptar.
Kristjan Asllani i Empolit mbetet i pëlqyer nga të dyja skuadrat e qytetit të Milanos.
Asllani 20-vjeçar ka pasur paraqitje shumë të mirë me Empolin në edicionin që lamë pas dhe kartoni i tij vlerësohet të jetë 15 milionë euro.
Interi synon që veç këtyre parave, t’ia ofrojë Empolit edhe futbollistin Sebastiano Esposito.
Reprezentuesi i Shqipërisë ka zhvilluar 34 ndeshje në të gjitha garat me Empolin në edicionin që tashmë ka përfunduar. Realizoi katër gola dhe pati dy asistime.