Kombëtarja e Kosovës U17 e ka mbajtur seancën stërvitore të radhës para ndeshjes së dytë të rrethit elitë me Italinë, e vlefshme për kualifikimet e Kampionatit Evropian 2022, që mbahet në Izrael prej 16 majit deri më 1 qershor.
Përzgjedhësi Arsim Abazi dhe shtabi teknik, duke nxjerrë mësimet nga ndeshja e parë kundër Ukrainës, me punë praktike, provuan të mënjanojnë gabimet dhe lëshimet eventuale.
Fokusi ishte në mbrojtje, por edhe në vijën e sulmit që ata të jenë më të përqendruar e të vëmendshëm para portës kundërshtare, transmeton Klankosova.tv.
Në Kombëtaren U17, përkundër humbjes në ndeshjen e parë, po mbretëron një atmosferë e mirë dhe përkushtim për punë me zell dhe ka një optimizëm se do të kenë rezultat pozitiv, pavarësisht se kundërshtari, Italia, llogaritet një rival i fortë.
Ballafaqimi me Italinë do të zhvillohet më 23 prill në orën 15:00, ndërsa në ndeshjen e fundit, më 26 prill, dardanët takohen me Poloninë.