Albert Bunjaki ka folur pas ndeshjes që Kosova U21 e fitoi në udhëtim te Andorra me rezultat bindës 0-3.
Trajneri që po udhëheq Kosovën U21 u shpreh i lumtur që Kosova për tre ndeshje me radhë nuk ka pranuar asnjë gol.
“Andorra është ekip i papërshtatshëm, fusha me bari artificial kishte vështirësitë e saj, temperaturat e larta e bënin të vetën, pastaj Andorra është një ekip që u ka shkaktuar problem ekipeve të mëdha sikurse Anglisë por dhe kombëtareve të tjera, por ne ia dolëm ta mbajmë lojën nën kontroll”.
“Nga 11 lojtarë sa ishin në fushë, 8 prej tyre kanë të drejtë të luajnë në kualifikimet e radhës, që do të thotë se i kemi dhënë hapësirë lojtarëve të rinj të cilët janë komponuar mjaft mirë me pjesën tjetër, thjesht kemi bërë lojë kolektive”, ka thënë Bunjaki pas ndeshjes.
Të motivuar me këtë fitore, Dardanët e rinj me datën 10 qershor, e presin kombëtaren e Anglisë në stadiumin “Fadil Vokrri”.
Kosova U21 pas tetë ndeshjeve renditet në pozitën e tretë me 11 pikë.