Skuadra nga Suhareka do ta vizitojë Llapin dhe me një barazim eventual në “Zahir Pajaziti” mund ta festojë titullin historik të kampionit dhe njëkohësisht edhe daljen e parë në Evropë. Në ndeshjet tjera të xhiros së 32-të të Superligës, Drita e pret Drenicën, kurse Gjilani e viziton Ulpianën
Ballkani nuk ka qenë kurrë më afër titullit të kampionit të Kosovës.
Skuadra nga Suhareka e dominoi fund e krye sezonin 2021/22, i cili do të mbyllet pas pesë xhirosh.
Ekipi Portokalli e sheh veten në pozitë të lakmueshme me 14 pikë më shumë se skuadrat ndjekëse, shkruan “Gazeta Express”.
Therandasve do t’ju mjaftojë vetëm një pikë me Llapin në udhëtim për ta siguruar edhe matematikisht titullin.
Do të bëhej fjalë për një titull historik për Ballkanin, i cili në këtë mënyrë edhe do ta siguronte daljen e parë në Evropë.
Nga ana tjetër, fitorja i nevojitet edhe Llapit, i cili po lufton për të dalë në Evropë.
Fituesi i Kupës dhe Superkupës synon t’i mbajë pikët në shtëpi.
Ndërkohë, Drita i bën gosti Drenicës, shkruan “Gazeta Express”.
Gjilanasit do ta kërkojnë fitoren për ta ruajtur pozitën e dytë në tabelë.
Kurse, Gjilani e viziton Ulpianën e dorëzuar.
“Skifterat” gjithashtu i duan tri pikët për të mbetur në garë për të dalë në Evropë.
Prishtina – Dukagjini mund të jetë një tjetër ndeshje interesante. Kurse, Feronikeli i dorëzuar e pret Malishevën.
