Koronavirusi, kryetari i Vitisë tregon për gjendjen e fundit në këtë komunë

0
64

Kryetari i Komunës së Vitisë, Sokol Haliti, ka folur për gjendjen në këtë komunë, meqenëse shtatë prej të infektuarve me koronavirus vijnë nga kjo komunë. Që nga dita e premte e deri më sot, në Kosovë janë 13 raste të personave të prekur me koronavirus, raporton Express.

Në një prononcim për Gazetën Express, Haliti ka thënë se e kanë situatën nën kontroll, por se kanë nevojë për pajisje mbrojtëse, sidomos për personelin mjekësor.

Sipas Halitit, nuk ka pasur ndonjë rast të ri të dyshuar për koronavirus në këtë komunë.

“Situatën e kemi nën kontroll. Është qetësi, edhe qytetarët po i respektojnë urdhërat e qeverisë. Por, kemi nevojë për pajisje mbrojtëse. Sidomos për stafin shëndetësor, sepse nuk mundemi me i rreziku ne personelin mjekësor. Ata kanë kontakt direkt me të dyshuarit se janë të prekur me koronavirus, edhe s’munden me hy pa pajisje mbrojtëse’, ka thënë Haliti për Express.

Vitia është futur në karantinë më 13 mars, pas konfirmimit të rasteve të para atje me koronavirus.

Ndryshe, Kosova të premtën edhe zyrtarisht ka hyrë në mesin e shteteve të prekura nga virusi i rrezikshëm, COVID-19, apo i njohur si koronavirus. Që nga dita e premte e deri më sot, në Kosovë janë 13 raste të personave të prekur me koronavirus.

Rasti i parë i konfirmuar me koronavirus është ai i 77-vjeçarit nga Stublla e Vitisë. Ai kishte hyrë më 5 mars në Kosovë nga shteti i Italisë, atje ku edhe tani situata me këtë pandemi ka dalë nga kontrolli.

I njëjti person dyshohet se gjatë qëndrimit në Kosovë ka marrë pjesë edhe në meshë, andaj shtohen dyshimet se virusin mund t’ia ketë bartur edhe personave tjerë.

Si rrjedhojë e këtij rasti, qyteti i Vitisë është futur në karantinë dhe nuk do të lejohet dalja ose hyrja e qytetarëve nga kjo komunë.

Njësoj si Vitia, edhe qyteti i Klinës është futur në karantinë. Kjo pasi që rasti i dytë i shënuar me koronavirus u konfirmua nga kjo komunë.

Një shtetase italiane, 22 vjeçare, shënoi rastin e dytë të konfirmuar me koronavirus në Kosovë. E njëjta kishte jetuar në Klinë, tek një familje kosovare, teksa besohet se ka punuar në një organizatë.

Rasti i tretë që u konfirmua dje nga Ministria e Shëndetësisë, dhe i njëjti ka lidhje familjare me rastin e parë nga Vitia.

E dy raste të tjera u konfirmuan të shtunën në mbrëmje. Një rast nga Stublla e Vitisë (kontakt i rastit të parë), i gjinisë mashkull, 42 vjeç, dhe një rast 37 vjeç, i gjinisë femërore, shtetase kosovare me qëndrim në Itali-Brescia, ka ardhur në Kosovë me datë 01.03.2020 nëpërmjet Aeroportit Ndërkombëtar “Adem Jashari“.

Vendqëndrimi i saj në Kosovë është fshati Bubavec, Komuna e Malishevës.

Si rrjedhojë, Qeveria ka vendosur që edhe komuna e Malishevës, njësoj si ajo e Vitisë dhe eKlinës, të futet në karantinë.

Ndërkohë gjatë ditës së diel, ministri i Shëndetësisë, Arben Vitia, ka njoftuar edhe për katër raste të reja të kosovarëve që janë prekur me koronavirus. Ai tha se nga katër rastet e reja, tre janë nga Malisheva, kontakte të rastit të parë, dhe një rast i ri nga komuna e Podujevës.

Megjithëkëtë, raste të reja u paraqitën edhe gjatë ditës së hënë.

Para pak çastesh, ministri i Shëndetësisë, Arben Vitia, ka bërë të ditur se janë konfirmuar edhe katër raste të reja të të prekurve me koronavirus në Kosovë. Sipas tij, këto raste të reja janë nga fshati Stubëll i Vitisë, familjarë të ngushtë të të moshuarit që u konfirmua i pari me pandemi./Gazeta Express

LEAVE A REPLY

Please enter your comment!
Please enter your name here