Ky është Agimi, shqiptari që përloti gjykatësin anglez, udhëtoi poshtë kamionit për djalin e sëmurë

0
310

Policia britanike vuri në pranga një shqiptar pasi në banesën ku jetonte ilegalisht iu gjendën sasi të mëdha kanabis.

Sipas mediave angleze ishte vetë shqiptari që lejoi policinë të hynte në shtëpi, ku u gjendën mbi 300 bimë kanabis të ngjeshura në dhomën e gjumit dhe në papafingo. Ngjarja ka ndodhur në Arbury Road, Angli. Shqiptari, Agim Selmanllari, ka një histori të dhimbshme, e cila e detyroi atë të shkonte në Angli ilegalisht poshtë një kamioni.

Sipas mediave angleze, Agimi është një baba i përkushtuar, i cili hyri në Angli me shpresën e fitimit të parave për të birin e sëmurë. Selmanllari, 32 vjeç, jetonte në shtëpinë e shndërruar në punishte kanabisi në kohën kur u arrestua, dhe u dënua me gjashtë muaj pasi pranoi fajin e kultivimit të kanabisit dhe vjedhjes së energjisë elektrike.

Sipas prokurorit John Evans më 2 nëntor një oficere policie shkoi të bënte një verifikim për një shtëpi para se të aplikonte për mandat kontrolli. Por kur pa nga dritarja, vuri re të pandehurin që po shihte jashtë, kështu që i bëri me shenjë atij t’i hapte derën. Ai e lejoi të hynte brenda. Selmanllari u arrestua e u prangos, më pas oficerja u ngjit në dhomën e gjumit, që shërbente si ambient kryesor mbjelljeje, ku pa 68 bimë “të rritura goxha”.

Në një tjetër dhomë gjumi pati shenja të një kultivimi të mëparshëm dhe nga dhoma shkohej në papafingo, ku ishin 77 bimë të rritura dhe 158 më të reja. Kur u mor në pyetje, Selmanllari shpjegoi se kishte hyrë ilegalisht në Angli poshtë një kamioni që vinte nga Franca dhe u kishte borxh 9000 paund trafikantëve që e çuan atje. Më pas u çua te shtëpia në Arbury Road, me marrëveshjen që të kujdeses për bimët deri sa të shlyente borxhin, duke e kërcënuar për familjen në Shqipëri nëse nuk bindej.

Ai tha se jetonte në katin e parë të shtëpisë dhe i lejohej të shkonte vetëm në një dyqan aty pranë për të blerë ushqime dhe gjëra që i nevojiteshin, si dhe xhetona energjie për pajisjet në katin e parë, për të cilat i jepeshin 200 paund në muaj.

Prokurori Evans shpjegoi se për katin e dytë ishte bërë një lidhje e paligjshme për të vënë në punë pajisjet e rritjes, ndërsa kati i parë ishte i lidhur me matësin për të treguar se energjia përdorej dhe paguhej për atë adresë.

Selmanllari shtoi se do t’i duheshin edhe gjashtë muaj për të shlyer borxhin, pas të cilëve do t’i jepeshin edhe 1000 paund dhe ai mund të vendoste nëse do të vazhdonte ta bënte atë punë.

Gjyqtari Sam Mainds vuri në dukje se ishte “sasi kolosale” kanabis.

Ndërsa avokatja e shqiptarit, Jane Brady tha se Selmanllari kishte rol të vogël në këtë aktivitet kriminal duke shtuar se ai u trafikua në Mbretërinë e Bashkuar për të punuar e për t’i dërguar pará familjes.

Avokatja tha:

Ai ka një djalë të vogël 4-vjeçar, të cilit i janë zmadhuar mushkëritë për shkak të një problemi që në lindje. Këtë e bëri nga dëshpërimi, të futej poshtë një kamioni e të sillej në Mbretërinë e Bashkuar. Ai ishte i dëshpëruar dhe donte të ndihmonte familjen e tij, e sidomos djalin e vogël. Selmanllari nuk pati dijeni për punën që do të bënte, deri sa u fut në atë shtëpi”.

Dhe për faktin që Selmanllari u mbajt në qeli që nga arrestimi, Brady shtoi:

Familja e tij vuan për bukë tani që nuk ka asnjë të ardhur prej tij”.

Nga ana tjetër gjyqtari Mainds shprehu keqardhje për historinë e shqiptarit dhe krimin për të cilin ishte vështirë që të shpëtohej.

Teksa e dënoi me burg Selmanllarin, gjyqtari i tha:

Ju erdhët në Britaninë e Madhe sepse dëshironit të fitonit pará për familjen tuaj të varfër dhe për të ndihmuar djalin e sëmurë. Vetëm një gjykate të ashpër nuk do t’i vinte keq për këtë situatë, por ju u përfshitë në atë që e dinit që ishte aktivitet i paligjshëm në çdo vend të Europës e sidomos këtu në Angli. Ishte një sasi e madhe kanabisi, i cili në treg do të vlente mijëra paund. E pranoj që ishit thjesht një punëtor që punonte nën urdhrat e kriminelëve seriozë e me përvojë”.

Duke vendosur që dokumentet e gjyqit t’i dërgoheshin Ministrisë së Brendshme, Gjyqtari Mainds shtoi:

Mundësia më e madhe është që t’ju kthejnë në Shqipëri”./joq

LEAVE A REPLY

Please enter your comment!
Please enter your name here